की यौ मैथिल समाज , की तय भेल मुद्दा : मखान या हवाई मचान
सब बेर के यैह हाल अईछ अपना सबके | चुनाव सं पहिने तक अपने सब चैक चौराहा स ल क फेसबुक /ट्विट्टर पर सबके अप्पन -अप्पन पार्सल मिथिला बचाओ अखिल ब्रहमांड समिति आदि के स्वनिर्वाचित अध्यक्ष राष्ट्रपति तक की आ कतेक बेर त अहू सँ पैघ | मुदा ठीक मतदान के दिन तक कुनो मांग , योजना ,बजट , एजेंडा कुनो समस्या या समाधान के योजना आदि किछ कतौ नय |
चलू जे दू टा मुद्दा के मानल जाय , मखान के जी टैगिंग बला मुद्दा | आ दरभंगा हवाई अड्डा के संचालन बला | हवाई अड्डा के लेल संघर्षरत सब मैथिल सपूत के कोटि कोटि बधाई | आ आभार के हकदार छाईथ सब गोटे ,अनुकरणीय लोक सब |
मखान निश्चित रूप सं बिहार आ ताहू में मिथिला के मिठास के पर्याय अईछ | भरि साल मखान के पोरा सँ ल क मखान पाक आ मखान तस्मय के मर्म मिथिला के भन्साघर सँ बेसी संभवतः आर कियो बुझैत होयत | मुदा ओकर ब्रांडिंग , स्नैक्स सं ल क स्वीट्स तक में मखान के ब्रांडिंग सब के विचार योजना सरकार लग कहाँ कियो पठा रहल छाईथ |
मधुबनी चित्रकला , मखान , पान , मैथिलि भाषा साहित्य सिनेमा एवं संगीत के समृद्ध परम्परा , मिथिला के भोजन सत्कार सं ल क शुद्ध सात्विक भोजन के पक्षधर ,सांस्कृतिक विरासत के गौरवपूर्ण इतिहास के शिरोधार्य केने मिथिला समाज आय अपन ताकत के ओहिना बिसरल बैसल अईछ जेना वीर पवनपुत्र माँ सीता के खोज में निकलय सं पहिने बिसरल छला |
समस्त मिथिला के एकाग्र एक एक भ ,पूरा मिथिला क्षेत्र के कल्याण के विषय सब , आर्थिक सामाजिक राजनैतिक सब दिशा में काज करय पड़त , सोचय पड़त | फिलहाल समय के माँग यैह अईछ |
DISCLAIMER: The author is solely responsible for the views expressed in this article. The author carries the responsibility for citing and/or licensing of images utilized within the text.
